La Usc di Ladins

Prejentazion dl Calënder d’Avënt
L Istitut Ladin Micurà de Rü, n cunlaurazion cun la Majon di Fascegn y l Istitut Cultural Ladin Cesa de Jan, nvieia ala prejentazion dl Calënder d’Avënt de Gloria Insam, n vënderdi ai 22 de nuvëmber dala 17:00 tl Circolo – Lia mostra d’Ert a Urtijëi
L se trata de n Calënder d’Avënt te set rujenedes, cun 24 de blòta stories sun l’amezizia, la cumpascion y tenì adum. I dessënies che ie leprò porta i mutons te n mond da d’inviern da ncant, plën de ventures y de cunsëies da uni di. Ntan la prejentazion puderàn scuté su pec de mujiga purtei dant da mutans y mutons dla Scola de Mujiga de Urtijëi.
N merdi ai 26 de nuvëmber dala 14:30 ie duc nviei de cuer a unì tla Biblioteca Tresl Gruber a S.Cristina a scuté su pensieres ora dl Calënder d’Avënt y a pastelné deberieda.
La medema manifestazion unirà fata nce ai 28 de nuvëmber, for dala 14:30, tla Biblioteca Oswald von Wolkenstein de Sëlva. Duta la mutans y duc i mutons dla scolina ie de cuer nviei.

Marcé da Nadé t’La Spona
Tl zënter sozial La Spona a Pidrô vëgnel indô tigní le Marcé da Nadé, en sabeda ai 30 de novëmber, dales 9:00 ales 16:00
Al mët man bel plan da gní frëit, i dis che nes despartësc da Nadé vëgn tres demanco y l’atmosfera vëgn tres plü plajora. Porchël oress i assistis y i assistënc dl Zënter sozial La Spona dër bel invié al Marcé da Nadé.
En sabeda ai 30 de novëmber ves aspetunse dales 9:00 ales 16:00, por ves mostré ci che i s’un ponsé fora de bel. I pitun creaziuns y decoraziuns fates a man, idees por scincundes da Nadé, gherlandes d’Advënt, lëgns da Nadé tradizionai y moderns, angeli, scatores de lignan vedl y n gröm d’ater bel patüc. L’Uniun Ladins Val Badia presentará dui libri nüs dales 14:30 cun n’ora de letöra por families. I esson dër ligrëza sce i gnisses a nes ciafé, i ves aspetun.

Tëmp da Nadé te museum
En sabeda ai 30 de novëmber dales 17:00 él tl Museum Ladin Ciastel de Tor n conzert dles mitans y di mituns dla Scora de musiga Val Badia
Le Museum Ladin Ciastel de Tor deura sües portes ince d’invern y inviëia ala manifestaziun »Tëmp da Nadé te museum«, cun n conzert dles mitans y di mituns dla Scora de musiga Val Badia, en sabeda, ai 30 de novëmber dales 17:00.
I vijitadus y les vijita­dësses gnará partis sö te deplü grups, che gnará portá un al iade te ciastel a ascuté le percurs musical. Intratan gnarál ofrí val’ da bëre y da mangé. L’entrada tl mu­seum é debann.

Francis, Hölscher, Sigl, Gringolts & Hagen
I Jëuni de Mujiga de Gherdëina nvieia al cuarto cunzert de chësta sajon de cunzerc, n mierculdi ai 20 de nuvëmber dala 20:00 tla Cësa di Cungresc a Urtijëi
Tl ensemble – che se à metù adum n chësta ucajion – sona pea Lily Francis (vidula), Franziska Hölscher (vidula), Gregor Sigl (vidula), Ilya Gringolts (vidula), Julia Hagen (celo) y Clemens Hagen (celo).
N ucajion dl 150ejim cumplì di ani de Arnold Schönberg, ie l program metù adum dai pec de Hermann Grädener (1844-1929), cuartet per strumënc a archët te D-Moll, op. 33, Johannes Brahms (1833-1897), cuintet per strumënc a archët te F-Dur, op. 88 y Arnold Schönberg (1874-1951), »Verklärte Nacht«, op. 4.
Duc i apasciunei ie de cuer nviei a unì a scuté su.