Te Fascia l é n grop de touses che va doi o trei outes en setemèna al zenter de equitazion de Selva e les tol pèrt a garejèdes. Zoe Guidubaldi da Dèlba é ruèda 9^ a Fieracavalli de Verona.
En domenia passèda te la Val Badia l é stat l tradizionèl Rait de San Linert olache se à binà i arlevadores de ciavai de duta la valèdes ladines. Ence da Fascia n é jit via n bel grop con si ciavai norics e haflingher ajache ence chiò la pascion per chesta besties taca a se slarièr fora semper de più. Fosc pec sà che te Fascia l é ence n bel grop de eles che à la pascion di ciavai da saut. Te chest moment les é de sie e les é dutes belebon joenes, dai 13 ai 17 egn, fora che una, che se pel beleche dir che l é la 'mère' de duta cantes. Te noscia redazion l é ruà enstadì Marica Soria da Vich compagnèda da Zoe Guidubaldi che dai 7 ai 10 de november l'à tout pèrt a Fieracavalli de Verona.
»Gio son semper jita
a ciaval canche stajee a Milan - ne conta Marica - na pascion che ge é dat su ence a mia fia Eleonora. Ajache te Fascia, e nience te Fiem do che i à serà a Pardac, no l é zentres per far saut ai ostacoi, tempruma jie a Trent. L era massa dalonc e senester, amò de più endana l Covid. Ė sapù del zenter de equitazion de Selva, la Pozzamanigoni e coscita aon tacà a jir aló, l era l 2021. Al scomenz eraane gio, mia fia e Eleonora Daprai da Pera che dant la jia a ciaval tel zenter atrezà de Ciampestrin. Do n meis se à jontà apede ence Julia Chiocchetti da Poza e per n bel pez sion state noi cater, le portae via gio a Selva. Tel anter à tacà a vegnir con noi ence Carlotta Costantino da Dèlba. La istrutora ne à dit che no i aessa più portà si ciavai a far gare, demò se i era privac, coscita aon dezidù de se comprar dute l ciaval. I lascion ló ti box e i ne li porta sul post canche jon a garejar.«
Zoe Guidubaldi: na gran emozion a la Fieracavalli de Verona Zoe Guidubaldi da Dèlba l'à 14 egn, la fèsc la pruma clas del Liceo linguistich de la Scola Ladina. »Mia familia l'à semper abù na gran pascion per i ciavai, del 2020 aon dezidù de n comprèr un, ades n aon trei ta Dèlba e un a Selva, chel che tole per fèr gares. Chest an é abù la possibilità de jir a la Fieracavalli de Verona, l era la pruma outa che tolee pèrt, l é stat na gran emozion percheche l é semper stat mie ensomech.
De più su La Usc stampèda de en vender ai 15 de november del 2024
(Monica Cigolla)
