La Usc di Ladins

Do na linia de inrescides, é i Carabiniers dla staziun da Corvara rová anencé de na trapolaria, sozedüda bele de setëmber. Cun le resultat che al é gnü abiné y dé dant dui ëi, che ê bele registrá tles banches dac y conesciüs pro les forzes de polizia. Sciöche i Carabiniers scrí te n comunicat, ê la vitima gnüda contatada da dui malfaturs che dijô da orëi ti cumpré jö meblaria che ara â metü da vëne sön le sit "subito.it". I dui ëi â indere döt ater tl ce. A forza da la oje y la intorje, á la vitima trat fora de gofa incër 3.000€ - en pert ciariá sön na cherta pre–paiada y en pert trasferis sön n cunt bancar. Döt cun la "vertora" che al foss insciö gnü sbloché i paiamënc che ê gnüs fac fora por la meblaria. Cun i azertamënc da pert di Carabiniers éson insciö rová pro i dui trapoluns – un titolar dla cherta, l’ater dl cunt bancar olache la vitima â paié ite la soma.  (pablo)