La Usc di Ladins

L é stat n bel domesdì de festa con Bambi en sabeda ai 9 de november ló da la caserma di Studafech de Vac. 'Novemberfest con Bambi' à binà n grum de jent che à tout su bolentiera l envit de la feruscola volontadives de chesta sociazion che se dèsc ju al ben de la families de bec che à problemes de desvaliva sort. Bambi la endreza scomenzadives, ativitèdes e festes per tirèr su bonamans che dapò la ge dèsc a la families che n à più de besegn.

Chest'outa la festa é stata endrezèda ensema al grop di Alpins da Poza che à fat crofegn con liènia e domesdì la castagnes. E la volontadives à metù fora n picol marcià de libres, pachec con ite de bela sorpreses, l era cheles che truchèa i bec e les à fat ence la peisa de le mesena de ardel. La neva, n muie aprijièda, l é stat i calandères de Avent per bec e per gregn fac da la bezes con più manualità e creatività con desvaliva sort de materièi. Ogne dì del meis de dezember, fin da Nadèl, i bec picoi pel orir su na picola fenestra de chisc calandères e troèr n douc, n oget o na frase.

A duc chi che à a cher Bambi ge dijon che te pech sarà n auter super apuntament: en mercol ai 4 de dezember da le 20:30 te teater de Pardac sarà l spetacol comich per benefizenza de Mario Cagol dal titol 'Smile'.

De più su La Usc stampèda de en vender ai 15 de november del 2024  (Monica Cigolla)