La Usc di Ladins

Chësc mertesc él le gran de dla Copa dl monn dles ëres sön la "Erta" d’Al Plan. La pröma manche é comanada da trëi atletes che á dötes bele davagné o fat medaies pro le gigant d’Al Plan. Al pröm post la "azzurra" Federica Brignone cun 56.04, cun n vantaje de 19 centejims sön Lara Gut–Behrami y de 27 centejims sön la svedeja Sara Hector. La Brignone á bele arjunt na devënta y dui terzi posć tla gara sön la "Erta". Sarál incö la secunda devënta? Lara Gut–Behrami á davagné la gara dl ann passé, Sara Hector é stada la reina dl 2022.
Por ci che reverda les atres talianes él püch da dí: Marta Bassino n’é nia piada ia por les coies, Sofia Goggia é tomada fora. Les atres é scialdi doía. Tla secunda manche piará ia ciamó Aja Zenere (20. post), Lara Della Mea (22.) y Ilaria Ghisalberti (26.). Taliana é sambëgn ince Lara Colturi, che garejëia sot la bandira dl’Albania. Ëra é al 8. post provisor cun n destach de 96 centejims dala Brignone. Lara Della Mea pó indere bele sëgn se ralegré de n pest: sciöche atleta cun le numer plü alt (le 39) che s’á cualifiché por la secunda manche, ciafarára le "Best Rookie 2025" - n bon de 2.000€ por na sojornanza tl raiun de Plan de Corones.
Dales 13:30 él söl program la secunda manche.  (pablo)