La Usc di Ladins

Alice Robinson é la "reina" nöia de Plan de Corones. L’atleta dla Zelanda Nöia á davagné le slalom gigant de copa dl monn sön la "Erta" d’Al Plan, do na secunda manche che é stada n "crimi" dantadöt por chëres che comanâ do la pröma pert. Cina misdé êl al pröm post la taliana Federica Brignone, dan la svizera Lara Gut–Behrami y la svedeja Sara Hector. Tla secunda ésera spo jüda döt atramënter. Sara Hector é tomada fora y insciö ince la Brignone, che â n gran vantaje sön sües sciables. Dër bun ti ésera indere jüda a Alice Robinson, cuinta do la pröma pert, che á metü sö le miú tëmp tla secunda manche y á taié le travert cun le tëmp total de 1:55.28. Lara Gut-Behrami á albü val’ dificolté, mo á mantigní la secunda posiziun a +0,56, tratan che le terzo post i é jü al’americana Paula Moltzan a +0,94. Bun resultat ince por la taliana Lara Colturi (che garejëia por l’Albania: ëra á stlüt jö tla cuarta posiziun. La miú azzurra é stada Lara Della Mea, che á recuperé bëgn önesc posiziuns y s’á plazé al 11. post, le miú de süa cariera.  (pablo)