La Usc di Ladins

A Al Plan y incër Plan de Corones sinton bele le borjú dla gara de copa dl monn dles ëres, che röia en mertesc ai 21 de jená a so 8. ediziun y süa 9. gara. La pröma ediziun é stada dl 2017, dl 2020 ne n’êl sté degüna y dl 2023 n’él sté cinamai döes. Do edemes che al vëgn lauré por arjigné ca le gran evënt, do che les tribunes é en pe y che al vëgn arjigné ca les ultimes por le raiun dl travert, él sté en domënia ince la FIS che á dé löm vërda por la pista, tres le control dla pista cun l’inciarié dla FIS Josef Zingerle. Deboriada cun le chef dl Al Plan Events Danny Kastlunger, le vize Diego Clara, le responsabl dla gara David Clara y le responsabl dla pista Daniele Clara s’án assiguré che la pista respognes ales condiziuns damanades, y chël ésera, porchël pó le spetacul mëte man.

Por la gara di 21 de jená é l’apuntamënt fissé dales 10:30 cun la pröma manche y dales 13:30 cun la secunda, olache an podará ince incunté na "icona" feminila dl schi talian, Deborah Compagnoni, che á te süa cariera davagné trëi medaies olimpiches, trëi campionac dl monn y la copa generala de gigant. Sciöche pro la gran pert dles ediziuns, a pert chëres desturbades sö dal Covid, ne manciarál nia n program rich de cornisc.

Liede deplü t’La Usc di Ladins di 17 de jená  (pablo)