La Usc di Ladins

Antermëia festejëia Sant Antone
En vëndres ai 17 de jená inviëia le Consëi de Cöra da Antermëia ala festa de Sant Antone abat, patron dla ciaussa y dla dlijia d’Antermëia. Domisdé gran batadú
Sant Antone é a Antermëia na festa sintida dala jënt dl paisc, pro chëra che al röia alerch ince tröpa jënt da foradecá, cis paurs y famëis che vëgn a se perié jö l’aiüt dl Sant por podëi passé l’ann nü zënza desfortünes a porsones, tiers y cosses. En vëndres ai 17 de jená ésera indô tan inant. Le Consëi de Cöra dl paisc inviëia ala festa, che mët man dales 9:00 cun la Corona te dlijia, y dales 9:30 sarál spo la santa mëssa da festa a onur dl Sant. Dedô vëgnel sorví val’ de cialt y düc ciafa n simbol dl Sant da taché söl guant. Por chi che ó, él la poscibilité da marné te salf dles manifestaziuns.
Domisdé vara inant te salf dales 14:00, olache al sará le batadú cun de bi pesć y ola dla fortüna. Les prenotaziuns al batadú vëgn tutes sö tres whatsapp al 338 6156637. Les entrades dla festa vá a bëgn dla dlijia.

Tomades, no dilan!
Ai 17 de jená él a La Val n domisdé sön la prevenziun dles tomades por la jënt de tëmp
La Portina por l’assistënza y cura organisëia en vëndres ai 17 de jená dales 14:30 ales 16:30, tl pice salf de Co­mun a La Val n domisdé sura la tematica: »Tomades, no dilan!«. Ara nen vá dla prevenziun dles tomades por la jënt de tëmp.
Al gnará mostré co fá da prevení tomades; co lové sö do na domada da susc, cun manco sforz; co daidé lové sö na porsona tomada, cun manco sforz.
Referëntes é les infer­mieres Karin Tavella y Maria Maggiori.