La Usc di Ladins

Tl mëis de jená de vigni ann vëgnel tigní les sessiuns forestales. Chëstes s’á mudé dassënn ti ultims trënt’ agn. Da sentades ma por i proprietars di bosć, olache ara se tratâ dantadöt da aprové tan de lignan che vigni proprietar podô taié, é les sentades deventades sëres d’informaziun sura tröpes tematiches ambientales, davertes a döta la popolaziun.
Les sessiuns gnô tignides scialdi te düc i comuns. La situaziun dl personal tles staziuns é tres ciamó sot al numer preodü, porchël ciarunse da les mëte adöm. Sön Badia é bele da tröc agn la sëra d’informaziun por i comuns de Badia y Corvara che vëgn tuta sö cun gran interes. Chësc ann vëgnel ince tigní la sessiun forestala por döta la staziun d’Al Plan tl salf dl Istitut Ladin a San Martin. Inviada é chiló döta la popolaziun di comuns de Mareo, San Martin y La Val, interessada a tematiches ambientales – bosć, munts, agricoltöra, natöra y ambiënt.
Les sessiuns forestales por i co- muns de Mareo, San Martin y La Val gnará tignides ai 15 de jená dales 20:00, tl salf dl Istitut Ladin a San Martin; chëres por i comuns de Badia y Corvara sará ai 23 de jená dales 20:00, tla ciasa Runcher a San Linert.