La Usc di Ladins

L prum dì de alenaments é scomenzà sui portoes “bruns” de Fascia anché, 2 de jené, col ciel corì desche da previjions. Al Ski Stadium Aloch l é ruà la atletes de la nazionèla de eles de Copa del Mond da Canada e Giapon a se enjignèr per i apuntaments de Copa del Mond.

A enjignèr i portoes l é i tecnics nazionèi de slalom, l fascian Stefano Costazza e Simone Del Dio e chi de la Svizera con a cef Matteo Joris: da doman 3 de jené a se arcedèr sun chest poroi sarà i miores slalomisć mondièi, che se endreza per la 3Tre de Campiglio. Avisa sul portoi de Poza apede a la squadra A talièna de slalom sarà la squadres de Copa del Mond de Svizera, Svezia, Croazia e Giapon, l team Henrik Kristoffersen de la Norvegia e l team privat WRA che tol ite atlec de Copa del Mond de desvaliva nazions. I arcedamenc al Ski Stadium de Aloch se dejouc da les 8.15 a les 11.45.

Se sul portoi de Poza la protagonistes l é la disciplines tecniches, te Fascia slumenea ence la steiles mondièles de la velozità, con i team e la mior atletes de schi alpin a livel internazionèl sul portoi La Volata te la Ski Area de Sèn Pelegrin,.

Jà da anché, col coordenament del tecnich federèl talian Giovanni Feltrin, à scomenzà a se arcedèr na carantina de atletes de Copa Tèlia e Copa Europa, ma ence i team de Copa del mond de USA, Franzia, Australia, Republica Ceca, Germania, Polonia, Bosnia e Erzegovina, Venezuela, Neva Zelanda e Finlandia.

Ai 6 de jené sun paladina sarà l Grop nazionèl Elite de Copa del Mond con Marta Bassino, Federica Brignone, Sofia Goggia, Roberta Melesi, Elena Curtoni e Laura Pirovano co la direzion tecnica de Gianluca Rulfi e l medemo dì vegn anunzià l arcedament de superG e libera respetivamenter de la neozelandeisa Alice Robinson, de cèsa a Soraga, e de la campiona americhèna Lindsay Vonn che jà tel passà se à arcedà sun Sèn Pelegrin col alenador Chris Knight.  (vp)