La Usc di Ladins

L assessëur provinziel Daniel Alfreider, l diretëur de departimënt Martin Vallazza y l diretëur dla Sta Joachim Dejaco ie deberieda cun i ambolc di luesc ujins jic a ti cialé ala plaza dai auti dla stazion de Pruca. Tlo iesen tl lëur de fé vel' lëur per miuré la situazion per duc chëi che tol la ferata o la curiera. Chi che muessa jì a lauré o a studië a Bulsan y uel lascé tlo l auto, l ne n ie nce trueps de Gherdëina, se fej for ert a abiné na luegia da parchejé. Suvënz iel bele daduman abenëura dut plën. 

N ie śën tl lëur de anjenië ca la plaza da lascé i auti, a na maniera che mé chëi che à l "Südtirol-Pass" y se noza di mesuns publics posse lascé i auti tlo debant. Plu dessegur sarà dut anjenià per la fin de jené.

"Chi che à n Südtirol-Pass puderà giaurì la stangia dla plaza dai auti cun si cherta. Sce n furnea cun la ferata o la curiera pòssen lascé l auto tlo debant, ma mé sce n furnea de reviers l medemo di. Chi che lascia l auto nchin al di do, giapa n miëur priesc", à spiegà l diretëur dla Sta Dejaco. 

Chi che ne n'à nia n "Südtirol-Pass" paia 0,50 € al'ëura. 

USC