La Usc di Ladins

N an che no jie amò a scola l é sozedù n fat che no é mai desmentià. Stajee ja Vich, sun Piz de Val, e na net l é crepà fora n gran fech sun Piz de Vich, te cèsa de la familia Deluca de Canucia, che anter l auter l é la veiora majon olache l é nasciù l Prinz Piscop Daniel Zen. Aló stajea Luciano Pellegrin Becé, con sia familia.
Anter i doi ciantons de Vich l era e l é amò n gran col, ampò enceben dalonc, se vedea l lujor de la fiames e l vent fajea ruèr la felisćes sun Piz de Val.
Mie père l era jà demez, al Lont. Mia mère, dassen n muie sprigolèda, ensema coi etres nesc vejins de cèsa, per dis e dis la é jita a veder che no sie zeche che coa. Se fossa crepà fora fech, se aessa brujà dut nosc cianton de cèses e tobié, sessaben de legn.
Da la tema che aessa podù sozeder vèlch, mia mère me à fat dormir trei nets sun let duta regolèda, adertura co la capa e i ciuzé, vertia a sciampèr.
Te chela net se aea brujà la stala, l tobià e la cèsa de Luciano Becé e sia familia. I era resté zenza nia!
La desgrazia la era stata da spaent ence per dut l paisc. Gé siere picola, no é mai sapù percheche l era vegnù fora fech e co che la familia la é stata bona de jir inant.
Acà no n muie de temp, sun ruèda sa Canucia e belapontin é scontrà Luciano, che bolintiera ma ence con pascion l me à contà dut cant.

Podede lejer dut su La Usc stampèda de en mèrtesc ai 24 de dezember.  (Annelise Vian)