La Usc di Ladins

N ciel sarëinn, 10 degreies, na nëif da spetacul: la cundizions fova ideéles per fé na garejeda sun n bel purtoi cun na trassa de gigant drët zaha.

Bele ntan che i atlec y la atletes se sciaudova ite y se cialova ju la trassa, ne fova i atlec y la atletes dl Schi Club Gherdëina nia da sëuraudëi cun si bela tuta nueva ghiela y bruma. Dala 9.00 à pona scumencià la prima manche cun la mutans dla categoria “ragazzi” y dala 11.30 la segonda manche. 

I atlec y la atletes dl Schi Club Gherdëina se à batù drët bën. Da auzé ora ie l prim post de Mattia Vinatzer tla categoria "ragazzi“. Giovanni Deanesi ie ruvà cuinto, Lukas Rabanser setimo, Matias Piazza nono y Robin Kelder diescejim. Tla medema categoria dla mutans ie Anna Oberhofer ruveda terza, Vicky Insam cuarta, Melissa Welponer cuinta y Holly Klotz diescejima. 

Nicole Piccolruaz à venciù tla categoria “allievi”. Francesca Miribung ie ruveda cuinta, Denise Demetz setima, Ines Puntscher nona y Poppy Klotz diescejima. Pra i mutons à venciù Matthias Mahlknecht. Pascal Kostner ie ruvà terzo, Valentin Petritsch cuinto, Daniel Merler otavo, Joannes Demez nono y Christian De Bernardi diescejim.

De gra a chisc bon plazamënc à l Schi Club Gherdëina venciù la tlassifica a scuadres, dan l Ski Team Seiser Alm y l Ski Team Latemar.




Per l Schi Club Gherdëina, Petra Perathoner

L articul tla edizion nueva de La Usc di Ladins de n vënderdi ai 10 de jené.