La Usc di Ladins

ROTT é n artist poliedrich, che cun prësc 70 agn de cariera artistica se dá jö dala pitöra ala scoltöra a istalaziuns multimediales y che á sües operes d’ert metüdes fora por le monn y te coleziuns privates de prestisc. Les operes de ROTT é caraterisades dal stil dles figöres spacades y tl profil, sciöche ince dal’adoranza de corusc stersc tla pitöra, cun sü sogec preferis les figöres feminiles, la moda y i ciavai.
Tl Catalogh él alzé fora sües ativités artistiches di ultims agn cun les mostres tl contest dla Bienala de Aunejia y de Miami Art Basel y les istalaziuns multimediales de musiga y ert dedicades al tema dla moda, che al á realisé en gaujiun de plü ediziuns dles Edemes dla Moda a Milan adöm cun la möta, la musizista Susy Rottonara. Deplü é ince i critics d’ert taliagn che á scrit en cunt dles operes dl artist, da Sgarbi a Levi a Beluffi. La 60. ediziun dl CAM é gnüda presentada a Milan da n evënt esclusif ai 30 de novëmber, tl salf Dino Buzzati tla sënta dl Corriere della Sera, cun la presënza de personalités dal monn dl’ert, dla stampa, de artisć y dl Presidënt Urbano Cairo. Pro le Catalogh é ROTT rapresenté da Arte Gallery.