La Usc di Ladins

Spetacul söi schi sön la Gran Risa
En vëndres ai 27 de dezëmber se presentará dötes les scores de schi dl’Alta Badia te n spetacul sön i schi sön la pista Gran Risa a La Ila
La pista Gran Risa, olache al é sté chisc dis les döes gares de Copa dl Monn, i fajará ince da cornisc a n spetacul sön i schi de dötes les scores de schi dl’Alta Badia. Sciöche l’ann passé, él ince en chësc invern gnü tut la dezijiun da se mëte adöm por presenté na serada d’animaziun particolara. Le spetacul, söl program en vëndres ai 27 de dezëmber, mët man dales 17:30 y an podará ti ciaré diretamënter dala zona dl travert dla Copa dl Monn jödapé dla pista. I maestri abelësc le scür dla sëra cun na defilada sön i schi cun i chentli sciöche ince cun na desmostraziun di liví dl jí cun i schi: dal jí a cadria cina al jí paralel y fá la ota »curva Italia«. N spetacul rich de adrenalina y che liëia düc i maestri de schi dl raiun dl’Alta Badia. Düc é dër bel inviá da tó pert ala manifestaziun.

San Salvester y Nanü tl’Alta Badia
Al vëgn pité ti paisc dl’Alta Badia na linia de manifestaziuns por saludé l’ann 2024 y ti dé le bëgngnü al 2025
Tl’Alta Badia mët man les manifestaziuns por saludé l’ann ai 30 de dezëmber: a Calfosch él la scora de schi adöm ai stödafüch che organisëia la lotaria cun musiga y le tradizional rait a val cun i chentli, abelí da n spetacul de löms laser. La manifestaziun mët man dales 17:00 dan la scora de schi a Calfosch.
Cui chentli a San Ciascian
Ince a San Ciascian vëgnel metü a jí da pert dles scores de schi n rait a val cun i chentli, le lönesc ai 30.12.: dales 17:00 pro la pista »Armentarola« cun la scora de schi Dolomites; dales 18:00 sön la pista »Piz Sorega A« cun la scora de schi da San Ciascian, a chëra che düc pó tó pert se scrion ite pro la scora de schi. Denanche pié da Piz Sorega jö él la poscibilité da se mangé na jopa.
A La Ila y Badia
La medema sëra dales 21:00 sarál sön la pista »Doninz« a La Ila les scores de schi da La Ila y Dolomites che fej n spetacul sön i schi adöm al »Pirates Freestyle Team«. Al 31 de dezëmber dales 17:45 podará düc i interessá tó pert al rait a val cun i chentli sön la pista »La Crusc 1«; al ne manciará sambëgn nia musiga cun le DJ y val’ de cialt da bëre jödapé dla pista. Por tó pert al rait mësson se scrí ite pro la scora de schi de Badia.
San Salvester a Corvara, San Ciascian y La Val
La nöt de San Salvester pó gní festejada te plaza sides a Corvara che a San Ciascian y a La Val: pro le marcé da Nadé da Corvara pón tó pert al conzert dl grup »CC4–ET« – la band de Cristian Cicci Bagnoli; tl zënter da San Ciascian sarál DJ Martino Sommadossi che fistidiëia dl intratignimënt musical y ince sön plaza de comun a La Val sarál musiga cun n DJ. Pro dötes trëi les festes vëgnel dé fora val’ da bëre y ares mët man dales 22:30.
Nanü a Corvara
Le paisc da Corvara ti dá spo le bëgngnü al ann nü cun n spetacul al 01.01.2025 dales 21:00 sön la pista »Col Alto«. La Scora de Schi da Corvara–Ladinia organisëia n rait a val cun i chentli adöm ales »netores« che jora cun i parapënc tl scür; deperpo gnarál ince ilominé le Sassongher. Ala fin vëgn la mani­festaziun abelida da n spetacul de löms laser. N DJ fistidiëia dl intratignimënt musical tratan la manifestaziun.

Orars de daurida MusLa Ursus ladinicus – invern
Le Museum

• 
•  

View the embedded image gallery online at:
https://www.lausc.it/manifestazions-y-evenc/28563-manifestazions-atuales-speziales#sigProId6213bb9e17

Ladin Ursus ladinicus deura ince d’invern! Dai 26 de dezëmber inant é les portes dl museum a San Ciascian davertes vigni jöbia y vëndres dales 10:00 ales 18:00
Le Museum Ladin Ursus ladinicus é dediché ala laurs preistorica di andri y ala geologia dles Dolomites. Te n frabicat nü de trëi alzades se destënn fora la mostra sön la storia y l’ambiënt de vita dles laurs di andri, che viô dan da plü de 50.000 agn y i fossii dles Do­lomites. Al vëgn cunté la storia afascinanta dla laurs di andri, n tier erbivor che podô pesé cina a 1.200 kg. L’ander de Conturines, olache les laurs viô a n’altëza de feter 2.800 metri, vëgn araté le sît plü alt dl monn olache al é gnü ciafé laurs y liuns di andri. L’ander de Conturines é ince na testemonianza dla storia climatica dl passé y atuala dles Dolomites. Descuride deplü sön la contrada da munt incër San Ciascian ia y gnide lassura ciodí che al foss sté plü oportun, dan da zirca 230 miliuns de agn, da s’armöie plütosc cun na brëia da surf co cun n snowboard. Gnide a vijité le museum chësc invern, i ves aspetun!