La Usc di Ladins

Ciampac se conferma no demò n aprijià raion dai schi ma ence n lech magich per i amanc de la cèspes. La festes da Nadèl à fat segnèr per la sozietà de impianc portamont Funivia Ciampac e Contrin n +10% de passajes respet ai medemi dis del an passà e jà chest l é n dat positif. Amò apede l é l suzes per la scomenzadiva de la ‘cèspes al fiorir del soreie’ che à portà sa mont n grum de jent che vel se goder l paesaje che se entenc del color de l’Enrosadira. N apuntament che vegnarà sport endodanef en lunesc ai 27 de jené e enveze en jebia ai 13 de firé sarà l moment de ‘Enrosadira Time’ da les 4 a les 7 da sera con la forenadoa che restarà averta più al lonch da sera. »Sion n muie contenc de noscia proponeta che se jonta apede al schi – à dit l president de la sozietà de impianc portamont Tullio Pitscheider – che fèsc cognoscer nosc raion desche n lech complet per duta la sorts de ghesć. Al prum apuntament de la cèspes al fiorir del soreie dai 23 de dezember à tout pèrt adertura 26 persones e l é stat besegn de meter a la leta doi menatroes.« L é l met ence de jir a fèr l percors con la cèspes compagné da n menatroi da doman bonora ogne mercol opura se pel jir ence da soi sul nef percors endrezà aldò. De jebia se pel jir a descorir duc i secrec de coche vegn fat la neif e veder coche vegn batù i portoes.