La Usc di Ladins

Anna Comarella, clas 1997 da Ampez de le Fiamme Oro e Caterina Ganz, clas 1995 da Moena de le Fiamme Gialle, se à fat onor raprejentan la Tèlia al Tour de Ski. La 19^ edizion del maor event del zircuit de Copa del Mond de paslonch e per la pruma outa é stata endrezèda duta te la Tèlia. La garejèdes se à dejout endèna la festes: ai 28 de dezember, pean via a la Nordic Arena de Toblach per restèr tel Sudtirol fin al prum de jené, ruan fin envers la Trei Zimes, e dapò se tramudèr te la val de Fiem fin ai 5 de jené.

Te la squadra nazionèla talièna, vidèda da Federico Pellegrino, l é stat tout ite trei atletes e atlec del raion ladin: apede a Comarella e Ganz, l era ence l moenat Giovanni Ticcò.

La doi ladines à serà su respetivamenter al 20° e 22° post l Tour de Ski, che à vedù al prum post la norvegeisa Therese Johaug dedant a la compagna de squadra Astrid Oeyre Slind; terza da atleta USA Jessie Diggins. 

Anter ic, gran prestazion per la Tèlia de Federico Pellegrino de le Fiamme Oro, che se à vadagnà l 4° piazament te la classifica generèla Overall tedò al norvegeis Johannes Høsflot Klæbo, l austriach Mika Vermeulen e l franzous Hugo Lapalus. Giovanni Ticcò, clas 2000 de le Fiamme Gialle, no l é jit aldò de sia spetadives seran su l tour al 32° post. Per la squadra talièna, do da Pellegrino e dant da Ticcò troon Elia Barp 16°, Martino Carollo 17°, Paolo Ventura 26° e Simone Daprà 29°.

Per i norvegeisc Therese Johaug e Johannes Høsflot Klæbo l é stat la 4^ venta te la classifica generèla del Tour de Ski, te na edizion dassen garatèda, che à vedù sul podie atlec de ben 15 nazions e n publich da record. Per l Comitat de endrez Nordic Ski de Fiem, con a cef l president Pietro De Godenz, n auter vèrech inant envers i Jeghes Olimpics e Paralimpics da d’invern del 2026.

De più su La Usc stampèda de en vender ai 10 de jené.  (Lucia Gross)