La Usc di Ladins

Chisc dis passé l é stat renovà la encèries de la Cèsa de Paussa de Fascia te la scontrèda del Consei, che tol ite i raprejentanc designé da duc i Comuns de Fascia, e che à dezidù la nomina de prestident/a, vizepresident/a e diretor/a de la APSP de Fascia.

L Consei resta en cèria per 5 egn e vigni raprejentant l pel fèr no più che trei mandac; l é ite Lucia Marchetti, confermèda dal Comun de Cianacei per l terzo mandat, e amò per la terza outa l é stat confermà Valli Graneris per Mazin e Barbara Bravi per Ciampedel. I conseieres Mariza Costazza per Sèn Jan, Marco Ganz per Moena e Cristina Buso per Soraga i era enveze stac nominé tel ultim mandat.
Aldò de n mudament al Statut, da pech tel Consei se à jontà ite ai raprejentanc di Comuns ence l raprejentant del Comun General de Fascia, che l à nominà Luca Pitolini.
I 7 conseieres se à binà apontin en jebia ai 9 de jené: Barbara Bravi, che la é a cef de la Cèsa de Paussa dal 2014, la é stata confermèda presidenta per la terza outa, e vizepresident l é stat confermà Marco Ganz. L Consei ge à ence renovà la encèria de diretora a Elisa Emiliani.

De più, ence con de autra bela neves per la Cèsa de Paussa de Fascia, sarà da poder lejer su La Usc stampèda de en vender ai 17 de jené.

 (Lucia Gross)