La Usc di Ladins

N prum vèrech concret per responer al besegn di sentadins de pruma cèsa rua dal Comun de Moena. L Consei de Comun, te sia ultima sentèda dant de la fin del an, à aproà dut adum n provediment per mudèr la aliquotes de l’IMIS (Imposta imobilièra scempia) su la seconda cèsa, na dezijion emportanta per ge jir encontra e sostegnir chi che fita con contrac regolères.

Aldò de n dombrament metù dant dal assessor Giancarlo Ramus se veit che tel paisc de Moena l é 2.958 majons (i sentadins a la fin del 2024 é 2.513), de chestes 1.091 les é de pruma cèsa. L’autres 1.867 l é seconda cèses, adertura l 63%, che les é spartides te: 532 seconda cèses de jent de paisc, 1.191 seconda cèses de jent foresta e 144 majons de sozietà. Chel che sauta sobito al eie di dac metui dant l é che de la seconda cèses de jent da Moena demò meses (265) é classifichèdes desche turistiches donca con regolèr codesc CIN. Ma amò piora l é la situazion de la seconda cèses de jent da fora de paisc: chiò demò 138 les é classifichèdes con destinazion de fit con codesc CIN. De la 144 majons che partegn a sozietèdes demò 19 les é sul marcià turistich.

Aldò de chisc dac l’Aministrazion de Comun de Moena à pissà che sie giust premièr chi che met a la leta sia majon a jent del post o lurieranc de sajon che stenta semper de più a troèr cartier.

De più su La Usc stampèda de en vender ai 17 de jené.  (Monica Cigolla)