La Usc di Ladins

Pasca é la maiú festa dl ann religius. Al é na festa che chërda i tröc fedei da jí gonot te dlijia. Te nüsc paisc vëgn i dis dl’Edema Santa ciamó tignis y recordá sciöche da vedlamënter incá. Por i cors de dlijia é chësta edema ince n’edema dër impegnativa.
Le comité dl Cor á orü stlü jö chësta edema de gran fede cun n pü’ de devertimënt y á organisé en Lönesc de Pasca do mëssa na picera incuntada cun na bela cufada. Ciantarines y ciantarins é gnüs inviá tl salf dles proes a sté n pü’ adöm, a s’la cunté y a se bëre val’. Cun de bi üs depënc se á düc mosoré pro le cufé, ciaran bëgn de rové tres plü inant. L’ü dala scüscia plü sterscia á albü la ciantarina Karin Clara, pro i üs de caia (quaglia) á Vinzenz Clara albü la miú. (Elisabeth Erlacher, por le Cor de dlijia da Lungiarü)

Deplü t’La Usc di Ladins di 2 de ma