La Usc di Ladins

Lurèr adum per didèr a na vida percacenta la popolazions de lesc manco fortuné. Con chest obietif del 2002 te la provinzia de Trent l é stata metù su l CAM, acronim de Consorzie Sociazions Mozambico.

Enlouta, do egn de conflit zivil tel Mozambico, che l era stat na colonia del Portogal, la situazion se aea stabilisà l é stat l'oportunità de poder se emprevaler de strutures enjignèdes da organisazions de aiut umanitarie internazionèl, che se n jia e i ge les lascèa a sociazions che aessa podù portèr inant projec e ativitèdes al ben de la popolazion locala.

Per chest, col sostegn fort de la Provinzia che enlouta, sot la vida de Lorenzo Dellai, l aea metù a jir n program de cooperazion decentrèda e ence n assessorat a la cooperazion internazionèla, l é stat metù adum 5 sociazions de la sozietà zivila del Trentin e l é nasciù l CAM. L sostegn provinzièl l é jit inant per egn, dapò dut l program provinzièl en cont de solidarietà l é jit a se desfantèr e i volontères se à trat ite la mènies per seghitèr a jir inant e no lascèr che dut vae do brea ju.

Per fèr cognoscer l’atività de chesta realtà solidala che l tol ite ence volontères da noscia valèdes e domanèr l sostegn ence da man de Fascia e Fiem, en vender ai 28 de mèrz i responsaboi del CAM à endrezà te la sala Rovisi a Moena na scontrèda dal titol »N pènt anter popoi«.

Do l benvegnù, sport a la jent che empienia belebon la sala da Annalisa Zorzi, l é stat la volontèra de CAM Giovanna Luisa a dèr la pruma informazions su chesta realtà, che anchecondì la tol ite te la Tèlia 43 persones: 6 dependenc o colaboradores, 5 joegn che fèsc servije zivil e 32 volontères; ben 127 l é la persones che laora tel Mozambico: 6 colaboradores da la Tèlia e 121 colaboradores del post. Te chisc egn te la Provinzia de Sofala, soraldut a Beira e Caia, l é stat envià via n muie de projec ti setores del svilup uman, economich e de ambient e teritorie. Ades l é 15 projec en cors e i va da la formazion per l’educazion di più picoi, per la prevenzion sanitèra e per la valivanza de gener a na radio de la comunanza, dal microcredit al sostegn per la coltivazions e per l’imprenditoria locala, da la desgorta de refudames e èga neigres a la pianificazion del teritorie.

A Moena l é stat rejonà en particolèr di projec educatives coi bec de la scolines e de chi tel setor sanitèr e de la prevenzion, che é stac prejenté respetivamenter da la volontèra Elisabetta Cavada e dal dotor Gianpaolo Rama, che l à lurà per n muie de egn te ospedèl fora Ciavaleis. Duc doi é stac più outes tel Mozambico, e i à portà sia testimonianzes.

Se pel lejer dut su La Usc nr 15 dai 18 de oril: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Lucia Gross)