La Usc di Ladins

L é aisciuda. Aisciuda Ladina! Chest an l Festival del lengaz e de l’identità ladina fioresc ti meisc de oril e mé con de bela scomenzadives leèdes al tem de la toponomastica che envia a jir sul teritorie e descorir i testamonesc veiores de noscia storia e comunanza. L Comun General de Fascia, l Istitut Cultural Ladin, la Scola e l’Union di Ladins va inant con la colaborazion a na vida che duc posse cognoscer e durèr i inomes ladins di lesc de noscia val e no vae perdù l leam col teritorie tant tegnù su da nesc veies. Ence chest an la scomenzadives é states slarièdes fora sun più setemènes acioche duc posse tor pèrt e esser protagonisć de chest event.

L program de chest an, metù ju col coordenament del Ofize Servijes linguistics e culturèi del Comun General de Fascia, perveit raides e spazirèdes, prejentazion de libres e laboratories, corsc e scontrèdes culturèles.
L prum apuntament l é en program en vender ai 2 de mé da les 20:30 te Ciasa de la Moniaria, sala Dezulian, olache l’Union di Ladins e l CGF prejenta l liber de la regoeta Entener e se fèr entener e l cors ‘fèr l ort’ con Sebastian Ghetta che via per de mé tegnarà 3 o 4 scontrèdes aló dal Agritur Soreie.
Per chel che vèrda la raides, la pruma sarà en sabeda ai 10 de mé: per endrez de l’Union di Ladins se jirùà vin Gherdena a la descorida di toponimes ladins de l’autra valèdes: sarà la vijita al Museum de Gherdëina, ai mèjes de Mëune de Peza e a la gejia de Sacun. Dapò l Comun General endrezarà amò 3 scontrèdes te Fascia.

Se pel lejer dut su La Usc nr 15 dai 18 de oril: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.




 (MCI)