La Usc di Ladins

L é peà via anché 25 de oril, tel dì del 80° cedean de la Festa de la Liberazion, l 73° Trento Filmfestival, dedicà a la mont e a la resistenza, che aldò de n program dezidù da temp l à chest an desche Paisc ghest l’Argentina, tera de naa de Papa Francesch, te chisc dis de gran manconia per sia departida.

Fin ai 4 de mé protagonisć assoluc sarà i film, ma ence libres e evenc, scontrèdes e debatic, con vèlch cercia ladina: do esser peé via te l’avertura ofiziala te la Sala Depero con ence l hotelier e ambientalist badiot Michil Costa, en sabeda ai 26 via per l domesdì te Piaza Fiera per i evenc T4Future sarà l spetacol »Sunsom« portà dant dai jogolieres fascegn de Circensema.

L moment più ladin de duta la manifestazion sarà en domenia ai 27, canche domesdì sarà en program doi film ladins. Da les 17:00 al Supercinema Vittoria la sezion “Orizzonti vicini” sarà averta da »Crepe de lum«, film curt de 8 menuc de Giancarlo Dorich co la Musega de Poza su le Torn del Vaiolet, che met dant l at conclusif de n percors peà via acà 30 egn e che à portà i sonadores vidé dal maester Giancarlo Dorich ”Cavei” a fèr endodanef, en ocajion di 90 egn de la fondazion, la rampinèda su la Torns portan sui spic più auc de noscia crepes la notes scrites aposta per chesta ocajion del amich e componist Marco Somadossi e la bandiera ladina. Do da chest sarà en program »Nella pelle del drago« de Katia Bernardi su l’opera del scultor Marco Martalar.

Semper en domenia ai 27, te la sala 3 del Cinema Modena, la sezion “Orizzonti vicini” se verjarà da les 17:00 col film de zirca 20 menuc »Transcardus-Balkanski Story« e dapò se podarà veder »Cincanta« de Paolo Vinati metù adum co la colaborazion de l’Union di Ladins dla val Badia tel chèder del projet “Interreg Italia-Austria CLLD Dolomiti Live”, che rejona de la religiosità populèra e più avisa de la tradizion de la corones del meis de mé te la capela de Pidrô te la Val Badia e che era jà ruà de jené al “Kalakari Film Festival” te l’India.

La sezion con »Crepe de Lum e »Nella pelle del drago« vegnarà moscèda amò en mèrtesc ai 29 de oril da les 14:45 te la Sala 1 del Cinema Modena e chela con »Cincanta« en mercol asi 30 de oril da les 18:45 semper al Modena te la sala 2.

Anter duta la lingia de evenc en program se pel uzèr fora en domenia ai 27 de oril da les 20:30 al Teatro Sociale la premiazion de la 51^ edizion del Premio Itas, en jebia prum de mé da les 21:00 semper al Sociale »Marmolada e Parete Sud: la Regina, le grandi vie e i protagonisti« e en sabeda ai 3 de mé da les 14:00 tel picol piaz Bruno Lunelli l enconter »Humal Library« co la partezipazion de Sara, David e Fabio da Fascia.

La proiezions del Trento Film Festival ruarà ence a Busan dai 3 ai 7 de jugne ai 23 e 24 de otober.

 (Lucia Gross)