La Usc di Ladins

Mircea, podësseto n curt te prejenté?
Son Mircea. Da plu de 20 agn vive nánter Fodom e la Romania, ulache son nasciù nel 1974.
Son maridé e è n fiol de 23 agn; ence mia fëmena laora nta Fodom.

Nte ci pert de la Romania viveto?
Vive a Hudești, n comun de 8000 abitánc pro la zité de Botoșani, ntel nord-est de la Romania, a 5km dal confin co l’Ucraina.
L é n luoch puoch aut, trop da bosch, ulache l’agricoltura l’é trop svilupada.

Ci ne conteto de tuoi pruns agn n Romania?
È fat le scole generale fin ai 14 agn. È po fat autri doi agn de spezialisazion, per po jì a laoré nte na fabrica tescil dalonc da cesa. Co è complì 20 agn, è mossù tò pert a n ann de servisc militar obligator.
Tourné a cesa, è fat per cinch agn l vigile nte mio Comun. È po bù l muot de me n jì demez e son rué nte la Talia.
È ciafié a me scrive ite nte le scole aute demè plu nnavánt, co eve bele scomencé a laoré; mpo, no n è ciafié a me diplomé, per­cieche sonve demez per laour. Ntei agn Novánta, davò che la Romania l’é passada dal Comu­nism a la Democrazia, l eva ncora tropa poverté e melsegurëza: le fameie, l plu de le oute, no i ava l muot de permëte ai tosac de sceguité a studié. (Ntervista de Milly Crepaz Istitut Ladin Cesa de Jan)