La Usc di Ladins

Pire Agreiter é gnü al monn ai 30 d’aurí dl 1937 söl lüch da Ciampidel a San Ciascian; sü geniturs ê Salvester y Maria Pitscheider de Sotciastel a Badia. Pire á albü fortüna da crësce sö te na familia religiosa. La mëssa dales domënies, la dotrina dl domisdé, oraziuns da doman y da sëra, pro mësa y la corona deboriada da sëra: döt chësc ê ince tla familia de Pire na cossa normala.

Ala fin é le tru religius sté chël che Pire á tut por süa vita. Le ginase ál fat a Ivrea pro i salesians de Don Bosco, á baraté plü iadi posć de stüde y á ince albü l’ocajiun da studié dui agn filosofia tla Université de Fribourg tla svizera. Le stüde de teologia ál metü man te convënt Muri–Gries a Balsan, olache al á dl 1965 ince dé jö la profes. Do che chë scora ê gnüda stlüta, él rové tl seminar a Porsenú. En le Gran San Pire, ai 29 de jügn dl 1968, é Pire (intratan deventé pater Pio), gnü consacré prou dal vësco Ujöp Gargitter tl dom da Porsenú, adöm cun i ladins Hans Maneschg da Cianëi d’Al Plan y Heinrich Perathoner da Linacia de Sëlva. La mëssa noela ál dit ai 7 de messé de chël ann a San Ciascian.

Do la consacraziun y la mëssa noela â pater Pio ciamó passé n ann de pastoral fora Desproch, spo âl finalmënter podü mëte man na vita pastorala tla ploania Gries por 5 agn alalungia, dal 1969 al 1974. L’ann 1975 á indô porté na gran mudada tla vita de pater Pio. Le convënt dles monies benedetines a Habsthal (comun de Ostrach), nia dalunc da Sigmaringen tla Germania, adorâ n spiritual nü. Chësc convënt é dal 1985 incá n priorat autonom cun le convënt Muri - Gries a Balsan. Sön orenté dl prior Dominikus Löpfe da Gries ê pater Pio rové fora Habsthal sciöche spiritual. Te chësta funziun i spetâl a pater Pio da dí vigni de mëssa, da pordiché vigni domënia y festa, da tigní referac ales monies, da confessé, da istruí les monies jones y da fá conësce la liturgia, da cianté ez. DImplü é pater Pio sté dal 1976 al 1992 insegnant de religiun te n ginase püch dainciará da Habsthal; te scora êl ma mitans y ara gnô manajada da monies benedetines.

Bele l’ann 1975 âl ince surantut n valgünes ploanies dailó dlungia, sciöche aministradú pastoral a Ostrach–Habsthal y Ostrach–Levertsweiler, ci che al á fat cina al 2002. Canche la Unité pastorala ”Ostrachtal” ê gnüda metüda en pe, ê pater Pio sté dal 2002 al 2009 caplan, mo spo s’âl amaré, â albü valgünes operaziuns y al â messü dé sö le laur tles ploanies y ê jü en ponsiun. La inciaria da spiritual dl convënt de Habsthal ál indere albü cina inultima. Ai 28 de novëmber dl 2024 s’un é pater Pio jü da chësc monn, cun l’eté de 87 agn. Süa sopoltöra é stada ai 5 de dezëmber tl convënt benedetin, olache al ê so dejider da gní sopolí. Na mëssa de requiem é ince gnüda tignida le de do la sopoltöra a Muri–Gries a Balsan.  (LT/pablo)