La Usc di Ladins

Calfosch á na Uniun dl teater nöia. Sü mëmbri án podü odëi en mercui ai 13 de novëmber, sön la pala­dina dl salf dles uniuns a Corvara.
En chësta sëra dla premiera y ince dl debut dla uniun, á le grup de jo­bleres y jobleri porté dant le toch »Paraisc y infern« (Himmel und Hölle) de Dietmar Steimer, traslaté tl ladin da Bruno Senoner y porté tl badiot da Ellen Alfreider, mëmbra y cofondadëssa dl’Uniun dl teater da Calfosch.
Sot ala regia de Annemarie Schenk de Sëlva á la gran pert di jobleri metü pe por le pröm iade sön paladina. »Al é da 4 mëisc y mez che i fajun proes. Al é bel da odëi finalmënter le grup sön paladina y i me infidass da dí, che ai é dër contënc dl resultat«, á dit Annemarie Schenk, che á azeté da surantó la regia dl toch cun le grup de teater nasciü da püch.

Te n iade na stiza y spo?

Avisa ci che al s’aspeta do dala löm dl tunel, n’él degügn che sá. Al n’é de chi che pënsa sura dî por ciafé na resposta, ala domanda de ci che al ti tocará tl ater monn, sce le paraisc o l’infern. Armin Trettel, l’ombolt de n paisc che ti somëia tröp a chël de Corvara, n’é nia un de chisc. Ala mort n’ál ciamó nia ponsé tröp. I pinsiers che acompagna Armin te let é d’atri: laurs de comun nia ciamó rová ia, impedimënc y baga­teles de paisc. Da bun cristian ne salta Armin nia l’oraziun serala denanche jí te let.
Al é n fat dër püch eroich che ti mët na fin ala vita dl ombolt arogant, che al parô che nia y degügn foss bogn da tigní sö. Ciamó en chë sëra, da mudé fora n pirn,se  ciafa Armin na dërta scas­sada, che le porta ia en l’ater monn.

Deplü ciafëise da lí tla ediziun nöia de vëndres, ai 22 de novëmber!