La Usc di Ladins

Por i cors de dlijia é la festa de Santa Zezilia n gran santú. Por festejé la patrona dla musiga de dlijia vëgnel gonot imparé ite na mëssa nöia o trat ca na mëssa particolara y solëna. Al é gonot ince chë festa olache an stlüj jö l’ann liturgich cun na buna marëna. Por le Cor de dlijia d’Al Plan él ciamó sté na ligrëza implü, deache cun la gran mëssa de Santa Zezilia é ince rové a süa colma n proiet particolar, che á scinché tröpes ligrëzes y emoziuns.
En chësc altonn á le Cor cun süa presidënta Karin Alfarei metü a jí le "Proiet Melodia 2024", olache an ti á dé la poscibilité a dötes y düc chi che orô, da fá na esperiënza pro le Cor de dlijia, da jí a cianté para, por abelí deboriada la gran mëssa de Gnissant y ince chëra de Santa Zezilia. Sce al ê tl pröm na certa "trica", sce al nen foss bëgn sté de chi che se lasciâ ite te chësta esperiënza, án tosc capí che la somënza ê tomada sön de bun terac. Ala fin él sté bëgn 18 ciantarines y ciantadus nüs che s’á anunzié y á tut sö chësta picia gran desfida ince personala, da ciaré a "orizonc musicai" nüs.

T’La Usc di Ladins di 22 de novëmber ciafëise deplü, insciö ince na intervista cun la presidënta dl Cor de dlijia Karin Alfarei y a Stefanie Watschinger, che á surantut la direziun dl Cor te chësc proiet.  (pablo)