La Usc di Ladins

L raport con la uties da mont l é un di setores de intervent che la Fondazion rencura da egn. Chest istà l é stat metù a jir n event che à portà momenc de cognoscenza e de reflescion sun argomenc desferenc te desvalives refuges del raion Dolomites Unesco. Te chest fin de sajon l é stat metù en program trei apuntamenc te nosc raion ladin, l prum en vender passà al refuge Roda de Vael.

»Chest event vegn da n percors che aon scomenzà coi gestores da mont acà trei – ne à dit la diretora de la Fondazion Mara Nemela – con azions de comunicazion per fèr entener che che l é na utia da mont. Chest istà aon endrezà na roda ti refuges olache l era l met e la desponibilità per moscèr col gestor che che vel dir viver te na utia e portèr inant l’atività, che la pel esser ence n muie desferenta anter n post e l auter, e per chierir de portèr dant l ruol più sćiantif de chesta uties. L ‘refuge’ descheche disc la parola, l é n post olache se troa azet, no n hotel o n restorant, e l era e cognessa seghitèr a esser ence n post olache vegn portà inant la cultura del jir sa mont, e per chest aon vardà te chesta roda de sporjer momenc de cognoscenza e reflescion tolan dant de outa en outa argomenc leé al jir e al stèr sa mont, che anchecondì anter mudamenc climatics e maor prejenza del om l é do che l muda. Dut chest vardan de troèr dates che no sie tel pien del lurier de sajon, per no dèr d’impaz o meter en dificoltà i gestores.«

De più su La Usc stampèda de vender ai 13 de setember.  (Lucia Gross)