La Usc di Ladins

L projet per la neva senta del Comun General de Fascia l é sun desch. La Comiscion à fenì da n trat duta la prozedura per cerner l venjidor e, do duta la verifiches pervedudes su la condizions tecniches e economiches che à confermà la dezijion, l projet ge é stat prejentà al Consei de Procura.

Descheche se sà l’aministrazion del Comun General vidèda dal procurador Giuseppe Detomas à dezidù de destinèr l’ultima de la veia casermes de Sèn Jan amò da fèr fora, la Vittorio Veneto, a neva senta del ent soracomunal. »Con dute le neve competenze e atribuzion che per lege ge pervegn al Comun General – à dit Detomas – aon gran besegn de aer più spazies, e a chesta vida podon ge lasciar dut l frabicat enlongia strada ai Servijes soziai, che ence ic con Spazio Argento i à semper maor besegn de post e la jent oramai la é usada a jir lo: l 90% de le persone che vegn te la senta atuala i rua per se oujer ai Servijes soziai.«

L percors per vardèr de ge meter man a la veia caserma era peà via amò del 2021, tel chèder de n projet complessif de manutenzion e valorisazion del patrimonie imobiliar del Comun General, e aldò de la valutazion sui besegnes che l’atività de chesta istituzion domana. Duta la prozedura del bando per cerner l projet, ge é stata data su al scomenz de chest an al Consorzie di Comuns del Trentin aldò del D.I.P. (Document de endrez de projetazion) con i criteries domané dal CGF, che à cernù de fèr n concors te doi fases, la pruma averta a duc i profescionisć e la seconda anter i prumes 5 classifiché. L Consorzie à nominà na Comiscion, con la funzionaria provinzièla Lorena Selva desche presidenta e con l tecnich del Comun de Moena Alberto Dallio e l funzionarie del Comun de Trent Alberto Ricci con la secretèra Emanuela Piva, responsabola di apalc del Consorzie di Comuns. Da chel moment fin a la setemèna passèda nience l Comun General à podù aer azes e veder i projec.

Su La Usc stampèda de en vender ai 6 de setember se pel veder l projet venjidor e l parer sun chest ejit del conseier de procura Carlo Ganz.
 (Lucia Gross)