La Usc di Ladins

La idea é pordërt bele nasciüda dan da cater agn, canche na maestra ti é jüda pormez ala ciantarina Lucia Kastlunger d’Al Plan, a damané sce ara ess podü mëte en pé n proiet da Nadé cun mitans y mituns dla Val Badia. "Na idea che m’é rodada dî tl ce", dij Lucia incö. Indere él spo gnü le Covid a mëte i bastuns danter les rodes y döt s’á archité ia. Chësc ann ésera spo gnüda a s’al dé y le resultat á inom "Send Jesus Today", tan co "Sce Gejú gniss o nascess aldedaincö".
Él n musical? No. Él n teater? Gnanca. Ci él pa spo? Dit en cört se tratera de n conzert olache al sará da aldí n cor de mitans y mituns dla valada cun solisć gragn y pici, acompagná da na band de musizisć profescionisć, olache al vëgn cunté danter na ciantia y l’atra na storia da Nadé ambientada ti tëmps d’aldedaincö.
La regia é de Simon Kostner, á ince metü adöm la storia. Le proiet gareta en colaboraziun cun le Cor Pices Usc d’Al Plan, sot la coordinaziun de Katrin Ellecosta y cun l’aiüt de Karin Oberpertinger. Les rapresentaziuns é ai 14 y 15 de dezëmber a La Ila.

 (pablo)