La Usc di Ladins

L Comun General de Fascia ge va encontra a la families e l met a la leta di studenc che stèsc te Fascia finanziamenc per corir en pèrt la speises de scola. 

Aldò del articol 72 de la L.P. dai 7 de aost del 2006, nr 5, l met a la leta di studenc fascegn che fèsc l secont livel de istruzion e formazion e che à i requisic pervedui, assegnes de studie e didamenc per l viac per l an de scola 2024/2025. La speises che pel vegnir finanzièdes l é cheles de stèr fora soranet, per magnèr o per viajes. A ogne boncont l didament no pel esser maor che la speisa che la familia dalbon à cognù ge fèr front e no de più che 4 mile euro al an. 

I assegnes de viac pel vegnir conzedui demò a la families di studenc del secont zicle de istruzion e formazion che no pel se emprevaler del trasport publich per jir da olache i stèsc a la senta de la scola. L contribut vegn conzedù aldò del percors che i cogn fèr e ence aldò de la condizions economiches de la familia e no l pel esser maor che de 400 euro per n fi e de 800 euro per doi fies. 

La domanes les cogn vegnir portèdes dant al Comun General de Fascia dant dai 20 de dezember, la copies del avis e di formulères de la domanes pel vegnir desćiarièdes dal sit internet del Comun General de Fascia. Per maor informazions se pel se oujer ló dal Ofize Assistenza Scolastica al numer 0462-764500 – int. 2, dal lunesc a la jebia da les 8.30 a les 12.30 e da les 14.30 a les 16.30 e de vender da les 8.30 a les 12.00.