La Usc di Ladins

Cesla, la Comunità energetica de la Scola Ladina e de la Scolina de Sèn Jan, da canche la é nasciuda, ti prumes meisc del 2023, no l’à mai lascià de soscedèr enteres anter desferenta realtèdes te noscia Provinzia e ence foradecà, desche ejempie positif de sensibilisazion e de azion concreta da man di joegn sui temes energetics. 

L grop de lurier, che tol ite i studenc del laboratorie de Robotica ‘Gome neve’ de la Scola Ladina, jà l an passà ai 23 de november del 2023 l era stat a Palaz Reèl a Milan al gran event internazionèl »Earth 4 all« per prejènter so percors e per contèr chel che l à metù a jir te Fascia per arvejinèr duta la comunanza, picoi e gregn, a la costion del sparagn energetich e de la produzion de energia da fontènes netes. 

Ence te chest uton 2024 l inom de Cesla l é jit fora a livel nazionèl, con n bel articol publicà sul sfoi tematich ‘Il Sole 24’ ore scrit da la giornalista Sara Deganello, che se pel amò lejer online. Amò na outa l é stat uzà fora l bel ejempie de empegn da man di joegn fascegn, che anter enrescides e scontrèdes i à portà te sia comunanza n pensier de gestion sostegnibola e percacenta de l’energia. 

Amò apede, ai 22 de november, i joegn de Cesla i é stac envié al event ‘Dessegnon Circuic de Ben-Esser’ tel chèder del Festival de la Profescions a Trent, sun na meisa torona che à volù ge portèr dant a la Comunitèdes energetiches che l é do a nascer te Provinzia informazions e strumenc per concretisèr a na vida più sorida sia idees. 

De più su La Usc stampèda de en vender ai 29 de november.  (Thomas Zulian)