La Usc di Ladins

Emoziuns da Nadé tl’Alta Badia
Marciá da Nadé, incuntades deboriada sön plaza, duciaries y produc dl post y sambëgn musiga da Nadé. Ti paisc dl’Alta Badia vëgnel metü a jí tröpes iniziatives por passé deboriada chësc tëmp particolar
Tratan le tëmp d’Advënt y da Nadé se tras­formëia i paisc dl’Alta Badia te posć da na atmosfera particolarmënter sintida.
Marciá da Nadé a Corvara y San Ciascian
A Corvara gnarál indô metü a jí le marcé da Nadé cun deplü partezipanc che dá fora val’ da bëre y da mangé, sciöche ince produc locai y d’artejanat. Le marcé gnará tigní dales 16:00 ales 19:00 y te deplü ocajiuns gnarál metü a jí intratignimënt musical da pert de deplü grups dl post. Sides le marcé da Nadé a Corvara che ince le Nadé te plaza a San Ciascian sará daverc dai 6 ai 8 y dai 13 ai 15 de dezëmber, sciöche ince sura Nadé dai 20 de dezëmber 2024 cina ai 6 de jená 2025.
A San Ciascian vëgn le »Nadé te plaza« metü a jí sön paiun de paisc. Te n valgönes üties vëgnel venü produc artejanai, val’ de duc da mangé y val’ de cialt da bëre. Ai 5 de dezëmber dales 18:00 pó i mituns s’la conforté a na picera scincunda da pert de San Micurá. Val’ sëra sarál ince grups dl post che porta dant musiga y cianties da Nadé.
»Adöm te plaza« a Calfosch
La plaza de dlijia a Calfosch i fajará da cornisc ai apuntamënc »Adöm te plaza«, plü avisa ai 6 y ai 23 de dezëmber, y ai 3 de jená 2025. Te chëstes ocajiuns gnarál dé fora dales 16:30 ales 18:30 val’ duciaria y boandes cialdes y an podará ascuté sö les plü beles melodies da Nadé. Pro le pröm apuntamënt gnarál San Micurá a ti partí fora scincundes a düc i mituns y por l’ultim apuntamënt sarál i Trëi Resc che cianta y incünda la bona noela.
Atmosfera da Nadé a La Ila
Ai 8, 13 y 27 de dezëmber y ai 3 de jená gnarál en chësc ann ince metü a jí le »Adöm te plaza« a La Ila. Na ocajiun por la jënt da se incunté, da sté adöm a se bëre n bun gote de vin cöt y a se gode le bel tëmp d’Advënt. I apuntamënc mët man dales 18:00 y les sëres gnará abelides da musiga dal ví. A La Ila passará San Micurá ai 6 de dezëmber dales 17:00, a ti porté na picera scincunda a düc i mituns, pro le parch dan la scora dai schi.
Incuntades da Nadé a Badia
Ince Badia lominará tl plü bel abelimënt da Nadé. Tla picera ciasota dlungia dlijia da San Linert, gnarál dé fora val’ de cialt da bëre cun musiga. I apuntamënc é preodüs ai 6, 13 y 20 de dezëmber dales 18:00 inant. Ai 6 de dezëmber, tres dales 18:00, gnarál San Micurá a ciafé i plü pici, cun na picera sorpresa.
Calënder d’Advënt sön les ciases da La Val
Ai 30 de novëmber, ai 6, 7, 13, 14, 20 y 25 de dezëmber, y ai 6 de jená podarán ince a La Val sté »Adöm te plaza«, olache al gnará dé fora val’ de cialt da bëre. Düc i apuntamënc gnará acompagná dales plü beles melodies da Nadé de deplü grups musicai dl post.
Ai 6 de dezëmber gnarál San Micurá y ai 6 de jená la poscignara a ciafé düc i mituns y a ti porté na picera scincunda. Tl zënter dl paisc da La Val podarán ince indô amiré le calënder d’Advënt da odëi sö por les finestres dles ciases.

»Send Jesus Today«
Ai 14 y 15 de dezëmber vëgnel presenté a La Ila na storia da Nadé dër particolara
Ci se á mo cunté le bo y le müsc te chë stala a Betlehem, dan passa 2000 agn? Ci ái mo aldí, ci ái mo odü? Te na storia moderna y musicala ti vëgnel finalmënter dé usc ai pröms testemoni dla nasciüda de nosc Salvatur. »Send Jesus Today« á inom la storia cuntada y dantadöt ciantada, che vëgn presentada de dezëmber tla Ciasa dla Cultura a La Ila. Le Cor Pices Usc cun solisć pici y gragn porta dant cianties componüdes aposta, acompagná da na band de profescionisć. Simon Kostner cunta la storia. I apuntamënc é por la sabeda ai 14 de dezëmber dales 15:00 y dales 20:00, y la domënia ai 15 de dezëmber dales 15:00. Prenotaziuns sot al link: https://bit.ly/sendjesustoday

Cordes y Butons prejënta »perig«
Cun si mujiga nvieia la grupa a n viac mujichel dala Elpes ora per l mond, faszinan chi che scota su cun melodies plëines de sentimënt, ma nce temperamënt
»perig« ne n’ie nia mé n album, ma n’esperienza cumpleta, che lieia adum la tradizion dla mujiga »da stua« y folclor globel.
L sona y cianta: Tamara Gamper, vidula y usc, Da­vid Moroder, armonica a butons, Reinhilde Gamper, zitra y usc.
L cunzert ie n merdi, ai 3 de dezëmber, dala 20.00, tl Tublà da Nives te Sëlva. La ntreda ie debant.