La Usc di Ladins

En vea de la giornèda per la eliminazion de la violenza contra la eles, en domenia ai 24 de november tel teater Navalge a Moena la sociazion La Voce delle Donne de Fiem e Fascia à metù a jir n bel spetacol, dal titol »Le radici del silenzio«.

Al scomenz, do l salut de la vizeombolta de Moena Cristina Donei, l é stat rejonà en curt de chesta sociazion, nasciuda acà 25 egn per ge stèr vejina a la eles e les didèr en cajo de besegn. La presidenta Maria Elena Gianmoena la era prejenta ensema con la raprejentanta de Fascia Ilaria Chiocchetti, che l’à recordà che ades La Voce delle Donne l’à 5 sot gropes, un dedicà soraldut a la eles sportives, un a l’èrt, n auter al setor di hobby, un a la coltivazion e regoeta de erbes e la medejina naturèla e l ultim, dedicà a teater, musega e bal, che à endrezà apontin chest event.

Con la regia de Emma Deflorian e Giuliana Lopes e l sostegn de l’Agenzia per la coejion sozièla de la PAT (UMSE oportunitèdes pervalives, prevenzion de la violenza e de la criminalità) »Le radici del silenzio« à portà dant a na vida evocativa n percors che pea via da la rejons culturèles che vel tegnir la eles leèdes per ruèr al zil de arjonjer la ledeza. Na vida desferenta per fèr pissèr a che che l é tedò a la violenza contra la eles, zenza ampò meter l azent sul aspet negatif de la violenza, ma sun chel positif del rescat.

De più su La Usc stampèda de en vender ai 29 de november.  (Lucia Gross)