La Usc di Ladins

La rassegna de la Biblioteca de Cianacei »Se cognoscione?«, metuda a jir per la terza outa dal responsabol Daniele Verra, l é n apuntament pissà per e con la jent del post, per se contèr, se cognoscer miec e se baratèr informazions e cognoscenzes. Te la terza scontrèda Nicoletta Riz da Cianacei à portà dant foto da zacan che l’à publicà ti libres »Ciantons« e »Fascegn« dac fora da l’Union di Ladins de Fascia. 
L'à dit che »Ciantons. Cartolines e proverbies da zacan« no l é n liber fotografich ma piutost n calandèr da desch olache ogne dì del an apede a na chèrta de posta, de la colezion de Fiorenzo Secchi Floz da Ciampedel, l é ence la descrizion e n proverbie per fascian e talian, donca n liber da tegnir avert e utèr piata do piata ogne dì che passa.
Te chela ocajion ence Sergio Valentini à portà vèlch foto veia del cianton de Cianacei olache l stèsc di prumes egn del 1900 e del paisc veie.

De più su La Usc stampèda de en vender ai 29 de november.  (Monica Cigolla)