La Usc di Ladins

L dotor Guido Dalprà, medico de familia de Fascia, à lascià su con en jebia ai 29 de aost sia enciaria per penscionament. Per 38 egn l é stat dotor a Moena, Soraga e Vich e per l rengraziar per so lonch servije en vender ai 30 de aost te sala de Consei l’aministrazion de Comun de Moena à endrezà n moment avert a la jent. »Aon volù se troar per ge palesar nosc develpai al dotor Dalprà – à dit l ombolt Alberto Kostner e la vize ombolta Cristina Donei – per dut chel che l à fat per la comunanza de Moena. Ne fasc piajer che l é stat sostituì dal dotor Luca Follador che l é da Moena, no l é sorì troar dotores che cognosc noscia jent.« L ombolt ge à sport na targa de rengraziament a inom de l’aministrazion e de duta la comunanza.    

N muie de si pazienc à volù esser prejenc per ge palesar fort sie develpai, la stima e la recognoscenza. Sentimenc che se à sentù fort te sala con la testimonianza de chi che à vivù en pruma persona la malatia o de chi che à abù malé te ciasa e i à semper troà tel dotor Dalprà na persona competenta, desponibola da dute le ore, vejina e umola.

De più su La Usc stampèda de en vender ai 6 de setember.  (Monica Cigolla)