La Usc di Ladins

Da pech l é fenì l’Europeada, l tornoi de balon de la mendranzes d’Europa olache la squadra ladina é stata vidèda dal alenador del Fascia Balon Luciano Cigolla. »L é stat n muie bel, – ne à dit Cigolla – ence se no sion stac bogn nience chesta uta de ruar ai carc de finala, aon jià ben e dapò aon vent l picol giron de chele restade fora. Sion stac contenc, vedù che l é n muie de squadre forte e atrezade, se aon godù n muie e posse demò rengraziar chi che me à domanà de far chesta bela esperienza.«

Ma ades l é ora de vardar al campionat: en domenia la é jita delvers... 
Ei, aon tacà ben l campionat contra l’Azzurra, squadra forta, ma fosc per ic jiar la pruma a 1400 metres no l é stat sorì, noi sion mingol più usé e chest ne à mingol didà. La partida era do a jir envers la  parità, ma do aer perdù doi ocajion en ultima aon abù mingol de fortuna. Chesta vent gio, con duta la squadra e dut l staff, volesse ge la dedicar a Pierina Ghetta. Fin canche la sanità la ge lo à permetù la ne é semper vegnuda do, a ne sostegnir con soa gaissa e soa ousc forza e la ne mencia.

Che ve spetade da chest campionat? 
Me saessa bel dir: nosc obietif l é venjer, ma no la é coscita. Son semper de chela che sie n campionat senester, percheche l é n muie de sozietà che tol jiadores a paament, donca no se sà mai con che squadre che se à a che far, le pel esser n muie forte e competitive. 

De più su La Usc stampèda de en vender ai 6 de setember.  (Lucia Gross)