La Usc di Ladins

Ai 27 de agost ie l prim ntervënt tla Ladinia stat a Al Plan per n seniëur che ne stajova nia bën. N ova l suspet de n bòt al cë. Do la cures dl dutor, cun l aiut dla Crëusc Blancia, iesen julei limpea tl spedel de Persenon.
L segondo ntervënt dl di ie stat riesc do marënda per n pitl mut de n ann che ova fieura. La zentrela à mandà l joler cun n dutor, che ti à cialà y à tëut la dezijion de l mené te spedel cun na ambulanza.

Da mesa la trëi domesdì à i Judacrëp de Gherdëina damandà do l joler per n’ëila de 63 ani che fova tumeda y se ova fat n tai y giapà na pitla scasseda al cë. La fova te na luegia da ulache i judacrëp ne se udova nia sëurora de la purté nchin pra auto. Do la cures dl dutor l’àn cia­rieda tl sach da binda y trata su – deberieda cun i judacrëp – cun na binda de 10 metri. N ie julei limpea tl spedel de Persenon.

Ruvei de reviers tla sënta a Puntives à n’ambulanza menà ada­lerch n’ëila de 50 ani dla Talia che fova tumeda cun la roda y univa for plu stleta. La se ova batù su l mus y fat n trauma al piet. N l’à ciarieda tl joler y meneda tl spedel de Bulsan.
L ultimo ntervënt dl di ie stat a La Val, per n ël che fova unì picià da na desëina de bespies ntan che l siova l pra. Ël ova riesc de bujën de aiut, ajache l ie unì tan stlet che l perdova cuscienza.
Cun l aiut di Destudafuech y dl’ambulanza ie l dutor unì purtà pra l ël per la prima cures. Do che n l ova stabilisà iel unì menà cun l joler tl spedel de Burnech.

De plu tla edizion stampeda de La Usc di Ladins o sun l e-paper a paiament www.lausc.it/e-paper