La Usc di Ladins

Gran Festa da d’Istà
A Cianacei dai 6 ai 8 de setember vegn endrezà la 43^ edizion de chest event de nonzech de la valèdes ladines. En domenia da les trei ponta via la gran defilèda con cères, Museghes e Gropes da duta la Ladinia
Dai 6 ai 8 de setember rua endodanef a Cianacei la Gran Festa da d’Istà per endrez di volontadives del grop di Studafech e de la Crousc Biencia. Trei dis de legreza, devertiment, musega, bal e folclor te tendon te Pian de Parèda coi gropes più cognosciui de duta la Èlpes. L grop de endrez envia duc i ladins a Cianacei per l event maor de en domenia con la gran defilèda fora per paisc a chela che tolarà pèrt zirca mile partezipanc coi guanc tradizionèi, Museghes e Gropes de folclor ence con cères e carozes fornides su. Dalmesdì e da sera de bona magnadiva e musega da saut fin tèrt.
Program
En vender ai 6 de setember
L tendon aur da les 19:00 con cojina e musega con D.J. Dany; da les 20:00 musega col grop »Thierseer Partyband« fin mesanet, do musega col D.J. Dany, l tendon sera da la una de net.
En sabeda ai 7 de setember
L tendon aur da les 11:00 con cojina e musega con D.J. Dany; da les 19:00 aur endodanef l tendon; da sera da les 20:00 musega col grop »Mürztaler«; da mesanet D.J. Dany e da la una sera l tendon.
En domenia ai 8 de setember
Da les 10:00 messa grana te pra tedant al tendon; da les 11:00 verc l tendon e la cojines; da les 11:30 aperitif col grop »Alpenland Power«; da les 15:00 ponta via la gran defilèda da strèda Roma per ruèr fin te strèda de Parèda; da les 17:00 conzert col grop »Alpenland Power«; da les 19:00 musega col grop »Die Kaiser­walder«; da les 23:00 se sera su la festa.

Chaos - leteratura scenica
Reprejentazion de dialogh
»L orden ne ruma nia su l caos; l caos à de bujën de zeche de semient al caos nstës, tl’essënza: coche la criatività. La criatività mët a post chël che ie sot, rie, spaventëus, chël che fej tenerëza y nce chël che ie mat«. Caos ie nasciù coche monologh n con’ dla tematica dl orden, l’idea che l orden posse vester bon o manco de cumandé l caos zënza gaujé drames o danns che n ne possa nia plu straiché ora tla sozietà.
N juebia ai 5 de setëmber dala ot da sëira saràl da udëi tla sala Circolo dla Lia Mostra d’Ert na reprejentazion de n dialogh a doi ujes da pert de Hanenn Huber, atëura, y Alex Cantarelli, autor y reghisser.
L ie na testemu­nianza dl jì a una dla rujenedes ntëur ala te­matiches dla creatività, viulënza y dla redenzion.

Gara dla roda »Crono Fanes«
En sabeda ai 7 de setëmber él indô la gara cun roda da munt o E-Bike, da Pederü cina sön Fanes
La gara mët man dales 11:00, cun start dlungia la ütia Pe­derü. Concorëntes y conco­rënc pëia ia un al menüt. Al sará categories desvalies (pro la roda da munt do eté, pro la e-bike do pëis). Por informa­ziuns plü menüdes y iscriziuns él da cherdé sö le 327 3698176. L’iscriziun costa 5,00€, da paié ite canche an ciafa le petoral. Cun l’iscri­ziun vëgnel azeté che l’organi­sadú ne surantol degüna respon­sabilité por ci che po­dess sozede dan, tratan y do la manife­staziun. Iscriziuns ma cun majera eté.

»Sëra«
Proiet de mostra dl Circolo-Lia Mostra d’Ert n cunlaurazion cun la lia EPL–Ert por i Ladins
Arnold Holzknecht, Céline Silbernagl, Damian Piazza, Diana Zinth, Joséphine Jobard, Larysa Kozhokar, Leonora Prugger, Medea Moroder, Martin Kargruber, Sara Solderer, Sara Welpo­ner y Veronica Moroder meterà ora si lëures pra la mostra »Sëra« tla sënta dl Istitut Ladin Micurá de Rü a San Martin de Tor.
La giau­rida sarà ai 7 de setëmber dala 18:00 cun na reprejentazion artistica cun mujiga de Céline Silbernagl y Bo Leiter. L simposium dan la mostra sarà dai 31 de agost nchin ai 6 de setëmber. L proiet ie na resposta criativa ala mostra culetiva »Äres« che ie stata d’instà a Urtijëi.
Cun l titul »Sëra« vën mpurtanta la tematica dla sëira. La sëira, l mumënt dl di, te chël che l surëdl va bel plan do ju y ti dà nscila al mond na lum nteressanta, che desmostra na magia particulera. L ie n mumënt de calma, de reflescion y criatività. Cun l fenomen dla »Enrosadira« nes pieta la sëira nce n liam ala Dolomites y al mond dla lijëndes.
Na lum ciauda, i culëures desfrënc, l simbol dla fin y dla transizion y la usanzes cultureles ntëur ala sëira, chësc ti pieta a chi che fej ert na gran ispirazion per l’esprescion de emuzions, tematiches y ideies te si opres.

Musighes ciantades de »Trëi«
Le festival Badiamusica vá a piz al 31 d’agost a La Val, cun le conzert dl grup »Trëi«
En sabeda al 31 d’agost dales 20:30 él te salf dles manifestaziuns da La Val l’ultim conzert dl festival Badia­musica 2024. Sön paladina podarán aldí le grup »Trëi«, metü adöm da Abélia Nordmann (usc y armonium), Gizem Şimșek (usc y saltier) y Mara Miribung (usc y cello).
Ëres che pita, efons, ëres che dij danfora le dagní y stries. Te chësc program cianta »Trëi« les cianties de chës ëres che verda pro i lec di vis y di morënc; cornidles, corf y agaces acom­pagnëia sües stories y cianties. »Trëi« se dá jö te na manira poetica y onesta cun porsecuziun, autorisaziun y feminilité.