La Usc di Ladins

Bon di Nora, posses'a cunté n curt chiche te ies y tan de ani che te es?
Nora Todaro Son Nora, vënie da Bulsan y é fat l Lizeum d'Ert a Urtijëi. É 21 ani.

Ciuldì es'a tu cris ora chësta scola?
É cris ora chësta scola dan ot ani pervia dla rujenedes y dla cultures desferëntes. L me à for bele sapù bel a avëi cuntat cun plu cultures. L cunzet dla scola paritetica che ie tla valedes ladines me à for plajù. Ne ulove nia pierder l talian y l tudësch, y ulove nce mparé vel'autra rujeneda leprò. Cieche ie ulove nce for, ie renfurzé y miuré l raport cun i ladins. Son dla minonga che te Südtirol tóchen da avëi plu cuntat nce cun i ladins. Sambën éi nce cris ora chësta scola per l'ert, ma chël fóssel pu nce stat a Bulsan. L ie propi la rujenedes che me à fat unì te Gherdëina. L ie nce na pitla scola, a Urtijëi, y chël me à for sapù bel.

Co iel pa pona stat pernanche te ies unida tla valeda?
Propi mé tl scumenciamënt ne n'iel nia stat saurì, ajache ne cunesciove deguni y fove l prim iede dalonc da cësa. Fove mpo mo scialdi jëuna y jì a viver sëula ne fova tl scumen­ciamënt nia saurì. Muesse mpo dì che n con' dla rujeneda y dla cultura ne n'iel nia stat problems y me é tosc usà a dut cant. Ne cunesciove nia truep di ladins, ma mpo iel jit scialdi debota y me é tosc sentì bën. Do doi enes iel per mé bele stat normal a viver te Gherdëina deberieda cun i ladins. Cieche me à for sapù bel ie che on tosc ris deberieda y rujenà dla robes che ie medemes y che nes cunlieia y chëles che ie desferëntes y é perchël mparà truep.

Deplù te la edizion dl 11 de setember