La Usc di Ladins

L fin de setemèna passà l'é stat rich de resultac per i atlec ladins ence te la brea e tel Freestyle coi schi.

Tel Snowboard Cross FIS di Colere, te la provinzia de Bergamo, a se fèr onor l’é stat Caterina Carpano da Fascia e Ester Gross da Ampez. La doi atletes ladines l’é stat la soula doi taliènes a ruèr a la finèla e a la fin Caterina Carpano la é ruèda sul podie al 3° post e Ester Gross l’à arjont l 5° piazament. Sui doi sciaieres più auc del podie se à logà la russa Yulia Lapteva, e Maeva Estevez de Andorra.

Tel snowboardcross de Colere da segnalèr ence l bel resultat di joegn Luca Apollonio e Gregorio Marchelli, clasc 2008 del Snow Cortina, che se à vadagnà l prum e secondo post anter i Ragazzi.

Tel Snowpark Freesnow sun Sèn Pelegrin se à dejout enveze la garejèdes de Copa Tèlia de Freestyle te la disciplines de slopestyle e big air. Chiò tel big air a se vadagnèr la venta te la categorìa Aspiranti con 114 ponts l’é stat Ginevra Zulian, joena del 2004 de Sèn Jan, del Ski Team Fascia e del Ski College de Fascia. Tel slopestyle l’é ruà enveze la medaa de arjent per l compagn de squadra e de scola del Ski College de Fascia, Daniele Calligari.

 (lg)