La Usc di Ladins

Per endrez de la sozietà Sci Fondo Val di Sol chest fin de setemèna passà a Vermiglio l’é stat metù a jir la garejèdes de paslonch de inseguiment con valuta desche campionac trentins.

En sabeda ai 15 l’é stat te gara a tecnica classica, e chiò a se vadagnèr la venta e l titol de campion trentin assolut l’é stat l’atlet da Moena de le Fiamme Gialle clas 2002 Simone Mastrobattista, che l meis passà l’à jà tout pèrt con bon ejit ence ai Jeghes Olimpics di joegn a Losanna.

L’atlet da Moena à confermà sia valuta ence l dì dò te la garejèda de inseguiment a tecnica ledia, ruan al prum post anter i Aspiranti e al 4° post assolut. 

Bon resultat per i atlec fascegn ence te anter i Allievi. Sun duc l mior ejit ladin l’é stat chel de Gloria Gabrielli de la Dolomitica e del Ski College de Fascia. Gloria la é sutèda jù la sabeda e per chest la ge à jontà l post sul podie, ruan 7^, ma l dì dò te la proa a tecnica ledia la é ruèda pruma, vadagnan coscita l titol de campiona del Trentin. A chesta vida Gloria é stata bona de ruèr sul podie ence te la combinèda di doi dis, vadagnan la medaa de bron.

I resultac di etres atlec fascegn su La usc stampèda de vender ai 21 de firé.  (lg)