La Usc di Ladins

Zacan l’òr l’é rua! Dò aer concostà ti egn passé de sia cariera 6 podies en Copa del Mond, chest’outa Mirko Felicetti de 27 egn da Moena l’é stat bon de ruèr sul sciaier più aut del podie.

Tel slaom lèrch paralel de Blue Mountain tel Canada en sabeda ai 29 de firé l se à vadagnà proa dò proa i miores posćte la calificazions e te la semifinèles, olache l’à batù l campion Roland Fischnaller ruan a se jièr fora la finèla con austriach Benjamin Karl.

Mirko Felicetti l’é da Someda, frazion de Moena, e l porta en aut da egn tel mond i colores de Fascia. L’é nasciù ai 15 de messèl del 1992 e l’é cresciù te la Socaizion U.S. Monti Pallidi. L’à vent 2 outes l campionat talian e l’é stat 4 outes sul podie Dal 2011 l fèsc pèrt del zircuit de Copa del Mond de slalom paralel, olache l’é ruà 6 outes sul podie: del 2014 a Montafon l’à arjont l terzo post ruan ti top ten de la classifica, del 2015 l’é ruà secondo a Rogla e terzo a Asahikawa fenian via la sajon 2014/15 al secondo post te la generèla de Copa del Mond. Dò na sajon passèda mingol senestra, chesta sajon con l responsabol de la squadra Cesare Pisoni la é scomenzèda ben per Mirko, con l secondo post arjont ai 8 de dezember a Bannoye, te la Russia. Ge auguron amò n muie de resultac al top!

De più su La Usc stampèda de vender ai 6 de mèrz 2020.  (Lucia Gross )