La Usc di Ladins

La neva diretives trentines dèsc maor ledeza de moviment e i atlec che pratega sport a la lèrgia i à podù se emprevaler de la neva normes per pontèr via con atività fora de cèsa. La strèdes e i troes se à coscita populà de runners e bikers, con jent che cor zacan jù dal tapis-roulant e rodes che se mef sveltes te sia pistes e no più sui rodoi per pedalèr te cèsa.

Nosc apuntament oramai fis con i miores atlec de la val fèsc coscita tapa apontin su la roda, de gra a l'intervista a Gabriele Depaul, fort atlet de roda da mont che dò esser cresciù con la roda te Fascia l'é passà da 4 egn en ca al Team Spacebikes. L ziclist fascian, stat ence campion talian canche l Team Spacebikes à vent l titol del campionat talian Team Relay te la categorìa Master amatori con la stafeta te la Val Casies (BZ) del 2018, l pratega ence paslonch d'invern coi Bogn da Nia, auter sport olache l'à vadagnà de bogn resultac.

Gabriele Depaul, clasc '88 da Dèlba, na vita su la roda. Veste ne contèr en curt tia cariera?
Na vita su la roda, belimpont. Me é arvejinà a chest sport canche siere amò toset de gra a Fiorenzo Detomas che l me menèa stroz per nesc monts a fèr raides e chilometres. L'é stat coscita che me é enamorà e é scomenzà a fèr dassen, semper però con l medemo spirit de devertiment. Coscita son jit ite te desvaliva squadres da la Toscana al Venet, olache é fat pèrt del team ofizièl Bottecchia desche Elite, dal Trentin tel Fascia Bike a la Lombardia, olache da 4 egn en ca core per l Team Spacebikes.

Donca t'ès coret ence tel Fascia Bike, una de la sozietèdes de roda fascènes. Che peisseste di desvalives team locai che ge dèsc na man ai bec fascegn a se arvejinèr a chest sport?
Ei, ence gé é fat pèrt del Fascia Bike e cree che aer na sozietà desche chesta sie vèlch de emportant per noscia val, per poder arvejinèr ence i bec più picoi a chest sport. Zenz'auter, se la fossa stata enlouta fossa stat n gran didament ence per me.

T'ès fat la ultima sajons con l Team Spacebikes, ma chest an l'agonism no à podù scomenzèr. Chest cambiel tia situazion e chela de la squadres?
Chest an aee programà na sajon n muie longia da firé fin de otober. Na sajon che pontèa via bonoriva con vèlch garejèda manco emportanta per troèr confidenza con mia roda e fèr la pruma suèdes, coscita da ruèr vertech ai apuntaments che conta de più. Jà de firé dant da chesta emergenza nazionèla siere stat bon de fèr 3 garejèdes de secondo pian, con 3 podies: doi ventes e un terzo post. De segur chesta emergenza arà conseguenzes negatives per duc i team.

De più se La Usc stampèda de vender si 8 de mé 2020.

 (Daniele Verra)