La Usc di Ladins

L'Alps Hockey League, tornoi olache partezipa la trei squadra ladines de hockey de Fascia, Gherdena e Ampez la é ceta, aboncont jà vèlch moviment de marcià l'é ruà, con doi joegn jiadores che à dezidù de lascèr l campionat per proèr na neva esperienza foradecà.

Enstadì l'é ruà defat la neva che Riccardo Lacedelli, ala destra clasc '95 nasciù a Pieve di Cadore, l'à cernù la Finlandia per sie proscim campionat, olache l jiarà te la squadra del Hokki. Lacedelli à jià sia ultima 7 sajons con la maia del Cortina: »L'é vèlch che no fae bele demò per mia cariera sportiva, ma ence per mia vita pernsonèla – se lec sul sit ofizièl de la squadra ampezèna – l'é n nef scomenz e no n travert. Son gé che cogne jir a me tor la sodesfazions«.

Cernia desvaliva, ma che va te la medema direzion de fèr na esperienza a la foresta, chela del fascian Sebastiano Soracreppa. L defensor clasc '99 di Falcons l'à cernù la Svizra per sia neva aventura e coscita l jiarà sia proscima sajon tel Thurgau. Sebastiano l'à perauter ence l passaport svizer, de gra a la giava da man de père cresciuda apontin tel Cianton de Thurgau, chest ge à dat l met al joen fascian de no pesèr sul numer de jiadores foresć che sia neva squadra pel jontèr al roster:  »Son n muie content – ne à dit Sebastiano Soracreppa – de chesta neva esperienza che podaré fèr e che me darà l met de emparèr trop. Voi zenz'auter rengrazièr n muie l Fascia, sozietà che me à semper didà, tant da picol che dapodò a crescer enscin a ruèr te la pruma squadra. Son segur che canche tel davegnir sarà ocajion de vegnir de outa, saré content de ruèr endò chiò«.

Vèlch outa ge vel donca fèr sceltes senestres. No l'é sorì lascèr la cèsa, i amisc e i compagnes de squarda. Epura l'é treni che passa n'outa soula.


De più su la Usc nr 21 stampèda ai 29 de mè  (Daniele Verra)