La Usc di Ladins

L’é fenì l temp de le challenge e di video sui social per fèr passèr con n bel grignot l temp del lockdown, ades l’é endò arcedament. Tant i Pavei d’Arjent che i Fascia Falcons à defat scomenzà a se troèr e a se enjignèr per la sajon da d’invern che, duc spera, la posse esser belebon regolèra e fèr desmentièr definitivamenter l burt virus che à arlontanà i bec dal sport.
Coi lurieres de manutenzion che empegna l Scola te chisc meisc, descheche ve aon contà acà vèlch setemèna su la Usc, no sarà la possibilità aer la giacia chest istà, amancol fin de setember (e dò se vedarà) e coscita la doi sozietèdes fascènes che se mef sui feres les à cognù troèr de autra vies per se arcedèr.
I Pavei d’Arjent à scomenzà jà de mé con l’arcedament off-ice e dapodò, dai 15 de jugn i à enveze cernù de desfrutèr la giacia de etres impianc: dant al Ice Rink Piné de Baselga, olache la squadra se à alenà fin al scomenz de messèl e dapodò al De Toni de Alleghe.
Ence i falchec, semper sot la direzion del nef arcedador de la squadra senior e diretor tecnich del setor di joegn Marco Liberatore, i à scomenzà sia atività de preparazion con l’arcedador atletich Roberto Pasero. Con la fin de jugn defat l’Under 13-15 e 17 les à scomenzà l lurier de arvejinament a la sajon agonistica e prest scomenzarà ence l’Unde 11.

De più su La Usc 27 stampèda ai 10 de messèl  (Daniele Verra)