Nience chesta setemèna l Fascia Balon é stat bon de venjer, enceben na bona prestazion fora de cèsa contra l Molveno.
La endesfida é tachèda ben per i fascegn che al scomenz i é stac bogn de tegnir l balon tel mez ciamp di etres. La pruma ocajion de la partida la é stata sui piesc de Gianni Riz che ampò, tanche ite da l’area, no l’é stat bon de meter te sach. Mingol a l’outa l Molveno à tacà a jièr e, sul mez del prum temp, l’é stat bon de passèr la pruma outa con na trata da ite l’area fascèna. L prum temp l’é finì con i fascegn inant, zenza però creèr ocajions da gol.
Te la seconda pèrt de la endesfida i patrons de cèsa à ciapà semper più ciamp e dò 10 menuc dal scomenz del secondo temp i é stac bogn de portèr l resultat sul 2 a 0 co na azion mingol fortunousa. Trottner e compagnes à seghità a proèr a segnèr per rimeter en pe l’endesfida, ma zenza ejit. A l’ultim menut l’é ruà ence l terzo gol del Molveno co na trata reversa al sgol te mez a l’area.
I fascegn proarà a rebaltèr l’ultim post de la classifica en domenia ai cater de otober contra La Rovere da mesa les cater sul ciamp de Cotura a Sèn Jan.
De più su la formazion e la squadra mendres su La Usc 39 di 2 de otober
(Pierpaolo Rasom)
