La uties da mont vel seghitèr a sporjer acolienza ma no sarà sorì se endrezèrcon la neva regoles sanitères e de distanza.
Les à levà sù n polveron la declarazions vegnudes fora enstadì sul sfoi La Repubblica da man del vize president del CAI talian e responsabol di refuges Antonio Montani che prospetèa la possibilità che i refuges cogne restèr seré chest istà a cauja de la mesures strentes de sanificazion e de distanza che ogne azienda cogn tor sù. »Zertifichèr che l’ambient l’é san e garantir la segureza sanitèra de chi che jirà sa mont, soraldut a certa autezes, l’é impossibol. Per chest refuges, uties e bivaches, dai 20 de jugn, la net no i podarà averjer desche inant.«
Le declarazion de Montani é state esplosive ence se dapò le é state subit retificade dal CAI - ne à dit Angel Iellici del Refuge Larezila, president del
Coordenament nazional di Refuges - che l’à manà fora sobito na letra a duc i refugisć. Noi no volessane restar serè, speton le linee guida del goern nazional e provinzial per saver miec che far ence se sion omegn prateghes da mont e pense che fossane duc bogn de se la far cà. La roba che ne destramet de più l’é che dant i problemes i cognosceane benon: co enviar via na azienda, co far i refornimenc, se cruziar del personal, l meteo, ades chisc aspec i é deventè secondaries, al prim post l’é le regole sanitarie e de segureza che per noi le é n mulge empegnative e crese che no fosse na azienda che l’aesse coscì tante dificoltà sot chest aspet come i refuges. Noi aon semper fat la politica de l’acolienza ades no volon assolutamenter cogner star sun usc a ge dir a nösc ghesć che no i pol vegnir int percheche no l’é post e no podon respetar le distanze. Canche vegn n temporal o l fioca o l’é vent co fajone? L meteo ne metarà trop en dificoltà.
De più su La Usc stampèda de jebia ai 30 de oril 2020. (Monica Cigolla)
