La Usc di Ladins

Chest no l’é n couribocia, l’é n courimus, na facera!

La neva ordenanza del president de la Provinzia de Trent Maurizio Fugatti consent de poder jir a pe e jir a corer ma ge vel aer dò semper l couribocia che l’é obligatorie ence per i bec sora i 6 egn. E con la setemana che vegn daperdut olache se va se cognarà semper l’aer sul mus.

Ma co fajei pa i bec picoi con chi couiribocia che no ge scuerc demò l nas e la bocia ma dut l mus?

L’é coscita che a David Dorich ge é vegnù na bela idea.

“Ge é domanà a mie compagnes del grop de teater I Bontemponi - ne à contà David che l’é l president del grop - se i fossa stac d’acort a ge enjignar a duc i bec del Comun de Sèn Jan n couribocia demò per ic, adatà a so mus. E i é stac duc sobito a una. Tel Comun de Sèn Jan en dut l’é 230 bec che fasc le scole popolare, noi n’aon fat far 250 per endana, ma i ne à jà domanà de n endrezar de autres.

Te chest moment no podon far comedia, no podon far grignar la jent da la paladina - ne à amò dit David - e donca aon pissà de jir te le ciase de noscia jent e ge portar n grignot con chest bel don spezial. Sarà mascre de protezion particolare proprio per i bec picoi. Chesta setemana che vegn ge le portaron fora a duc i bec. Speron che la jent aprijie chest don, noi l fajon col cher e volon ge dir a duc che i speton a teater apenamai che se podarà endò jir sun paladina, endana me racomane semper col grignot sot l couribocia.”

L grop de teater I Bontemponi con soe comedie l tol sù scioldi per far benefizenza. Canche l’é tacà ite l’emergenza per coronavirus l ge à sport 2 mile euro a la Crousc Checena de Fascia e ades l n’à spenù autres tenc per ge sporjer i couribocia a duc i bec de Sèn Jan. Dassen na bela pissada. A David e a dut l grop de I Bontemponi va segur n fort develpai.



 (Monica Cigolla)