La Usc di Ladins

Te la scontrèda del Consei General chiamèda ite ai 23 de oril dal president Francesco Pitscheider en videoconferenza, l prum pont de discuscion del Consei l’era la mozion del grop de mendranza UAL di 21 de jené en cont del desch de lurier trilateral per la neva competenzes del Comun general.

L conseier Cesare Bernard à deschiarì chei à dezidù de tor de retorn la mozion per desvaliva rejons. 

Prum de dut te chest temp senester no l’é na costion prioritèra soraldut, per la Provinzia e la Region. Apede chest, dò la prejentazion de la mozion, l Consei de Procura à nominà si raprejentanc per chest desch te la persones de Elena Testor, Luca Guglielmi e Thomas Amplaz. Ampò – à dit Bernard – chest desch é cionch ajache mencia l coordenament con Provinzia e Region, e soraldut per la nomina aessa cognù vegnir tout ite l Consei general, che aea aproà la costituzion de chest desch.

Amò apede l grop consiliar UAL à contestà l fat che mence l raprejentant de la mendranza: »se la nomina de Thomas Amplatz, che à duta noscia stima personala, – à dit Bernard – aea chest obietif, sotrisson che no l’é n muie democratich che la maoranza nomine l raprejentant de la mendranza.«

Bernard à dapò recordà la seconda pèrt de la mozion, che pervedea che l desch cogne tor dant duc i passajes de competenzes, sotrissan l besegn che chest vegne metù en doura ence per costions desche chela de l’Istitut Ladin, che à creà gregn problemes te l’istituzion culturala de val. »N passaje de competenzes cogn vegnir pissà e valutà te sia percacenza e funzionalità – l’à dit - no l pel vegnir metù dant desche n slogan per tirèr l consens.«

Elena Testor à responet recordan l’iter e i desvalives passajes aministratives del desch e l’à dit che a cef de la formazion del desch l’é la Provinzia; chesta à domanà i raprejentanc del CGF che é stac nominé dal Consei de Procura, anter chisc Thomas Amplatz, che più de n’outa à palesà enteress per l desch trilateral. En cont de l’ICL Testor à dit che se trata de na polemica zenza fondament eGuglielmi à jontà ite che chest passaje de competenzes l’era pervedù jà da egn, che el se à confrontà con l cda de l’Istitut e l’à chela, canche sarà passà l’emergenza sanitèra, de se confrontèr amò per portèr dant na proponeta che ge vae ben a duc.  (Lucia Gross )